Në Ditën Kombëtare të Trashëgimisë Kulturore, ministri i Turizmit, Kulturës dhe Sportit, Blendi Gonxhja, ka ndarë të dhëna të reja për Amfiteatrin Antik të Durrësit.
Në 60-vjetorin e zbulimit të tij, monumenti ka hyrë në një etapë të re të ruajtjes dhe studimit. Sipas Gonxhjas, ka nisur zbatimi i Planit të Konservimit dhe Gërmimeve Arkeologjike, një investim i Ministrisë së Turizmit, Kulturës dhe Sportit.
Paralelisht, vijojnë kërkimet e projektit italo-shqiptar “Durrësi Mesjetar – Amfiteatri”, i cili prej vitit 2018 po sjell të dhëna të reja për historinë dhe zhvillimin e monumentit.
Edhe interesi i turistëve dhe vizitorëve për Amfiteatrin është rritur. Nga janari deri në gusht të vitit 2026, monumenti është vizituar nga 28,823 persona, rreth 16.3% më shumë krahasuar me të njëjtën periudhë të vitit të kaluar.
Gonxhja theksoi se, gjashtë dekada pas zbulimit, puna për studimin, mbrojtjen dhe ruajtjen e Amfiteatrit të Durrësit vijon, me synim që kjo pasuri e rëndësishme e trashëgimisë kulturore t’u përcillet edhe brezave të ardhshëm.
