Policia e Shkodrës ka zbardhur një operacion të rëndësishëm, ku u gjet një pako me lëndë plasëse, dyshohet se e hodhën gjatë një ndjekjeje dy të rinjtë, David Simoni dhe Mikelian Tome, të cilët u arrestuan më 26 mars të këtij viti. Ata ishin në një motor me targa të vjedhura dhe dyshohej se po transportonin një sasi tritoli me qëllim shpërthimin në një vend të caktuar.
Pas arrestimit të tyre, policia ka vijuar hetimet dhe ka kryer kontrolle në lagjen “3 Heronjtë” në Shkodër, ku është gjetur paketa me lëndë plasëse, e cila dyshohet se është hedhur nga Simoni dhe Tome gjatë ndjekjes më 26 mars. Lënda plasëse është sekuestruar si provë materiale dhe është dërguar për analizë.
Sipas policisë, motoçikleta me të cilën ata lëviznin u pikas rastësisht nga patrullat e sigurisë në lagjen “Xhabije”, dhe pasi nuk iu bindën urdhrit për të ndaluar, ata shpërthyen në një ndjekje, që zgjati rreth 20 minuta. Motoçikleta u përplas dhe u kapën dy të rinjtë. Verifikimi i saj zbuloi se targa ishte e vjedhur dhe numri i shasisë ishte i ndryshuar.
Hetimet vijojnë për zbardhjen e plotë të ngjarjes dhe identifikimin e mundshëm të shënjestrës së këtij sulmi. Gjatë kontrolleve të kryera në dy makinat e tyre, janë gjetur një bidon me benzinë, një silenciator dhe disa doza kokainë, duke ngritur dyshime se plani i tyre mund të ketë përfshirë aktivitete të tjera kriminale.
Të dy të rinjtë, të cilët nuk kanë bashkëpunuar gjatë marrjes në pyetje, po mbahen në arrest dhe hetimet do të përcaktojnë më shumë detaje lidhur me veprimtarinë e tyre kriminale.
