Pas disa ditësh sulmesh të ndërsjellta mes Indisë dhe Pakistanit është rënë dakord për një armëpushim të plotë dhe të menjëhershëm.
Ky vendim u njoftua nga presidenti amerikan Donald Trump në rrjetin e tij Truth Social ku shkruan: ”Pas një nate të gjatë bisedimesh të ndërmjetësuara nga Shtetet e Bashkuara, kam kënaqësinë të njoftoj se India dhe Pakistani kanë rënë dakord për një armëpushim të plotë dhe të menjëhershëm. Urime të dy vendeve për përdorimin e logjikës së shëndoshë dhe inteligjencës së madhe.”
Nga ana tjetër Sekretari amerikan i Shtetit, Marco Rubio, sqaroi se mes dy palëve do të ketë bisedime për një gamë të gjerë çështjesh.
Në një postim në X, ai ka sqaruar se ka biseduar gjatë 48 orëve të fundit së bashku me zv.Presidentin amerikan JD Vance me zyrtarë të lartë indianë dhe pakistanezë, përfshirë Kryeministrat e të dy vendeve.
Vendimi për armëpushimin vjen pasi sulmet ushtarake mes dy vendeve u përshkallëzuan dhe shkaktuan vdekjen e dhjetëra personave dhe plagosjen e shumë të tjerëve në rajonin e Kashmirit.
Është pikërisht ky rajon që është në zemër të konfliktit mes dy vendeve të cilat kanë mosmarrëveshje territorial. Të dy vendet e pretendojnë Kashmirin si të tyren, por në realitet kontrollojnë pjesë të ndryshme të territorit.
