Hamasi ka reaguar ashpër ndaj deklaratave të fundit të presidentit amerikan Donald Trump, duke i cilësuar si një mbështetje të drejtpërdrejtë për kryeministrin izraelit Benjamin Netanyahu që të braktisë armëpushimin dhe të intensifikojë rrethimin e Gazës.
Në një mesazh për Reuters, zëdhënësi i Hamasit, Abdel-Latif Al-Kanwa, theksoi se mënyra e vetme për lirimin e pengjeve të mbetura është respektimi i marrëveshjes së armëpushimit dhe kalimi në fazën e dytë të saj. Ai akuzoi Izraelin për shkeljen e marrëveshjes duke vendosur një bllokadë totale në Gaza pas përfundimit të fazës së parë të armëpushimit të shtunën e kaluar.
Marrëveshja, e negociuar me ndërmjetësimin e dërguarve amerikanë, parashikonte një lirimin e pengjeve në faza të ndryshme, ndërkohë që bllokada e re ka shkaktuar alarm për krizën humanitare në enklavën palestineze. Me 2.3 milionë banorë të izoluar dhe furnizimet e ndërprera, ekziston frika për një përkeqësim të gjendjes, me pasojat e mundshme të një urie masive.
Hamasi dhe ndërmjetësit ndërkombëtarë kërkojnë zbatimin e plotë të marrëveshjes, por Izraeli insiston që pengjet të lirohen pa kushte përpara çdo diskutimi mbi përfundimin e luftës. Në këtë klimë të tensionuar, ndërhyrja e SHBA-së dhe qasja e administratës Trump mbeten faktorë kyç në zhvillimin e situatës.
