Bordi i Transparencës ka vendosur këtë të shtunë, më 6 qershor, çmimet e reja të tregtimit të karburanteve në vend.
Sipas vendimit të miratuar në mbledhjen e radhës, çmimi i shitjes me pakicë i naftës nuk duhet të jetë më i lartë se 190 lekë për litër, ndërsa çmimi i shitjes me shumicë është përcaktuar në 178 lekë për litër.
Ndërkohë, për benzinën, Bordi ka vendosur që çmimi maksimal i shitjes me pakicë të jetë 173 lekë për litër, ndërsa ai i shitjes me shumicë 161 lekë për litër.
Autoritetet bëjnë me dije se çmimet e reja kanë hyrë në fuqi sot, në orën 14:30 dhe do të mbeten në fuqi deri në mbledhjen e ardhshme të Bordit të Transparencës, ku do të shqyrtohen ndryshimet e mundshme të tregut.
Bordi u ka tërhequr vëmendjen të gjithë operatorëve që ushtrojnë aktivitet në tregtimin me shumicë dhe pakicë të nënprodukteve të naftës për zbatimin e detyrueshëm të këtij vendimi.
Sipas njoftimit zyrtar, në rast se konstatohen shkelje nga operatorë të ndryshëm, do të merren masa deri në pezullimin e aktivitetit.
Në deklaratë theksohet se Ministria e Ekonomisë dhe Inovacionit, në bashkëpunim me Ministrinë e Financave dhe Ministrinë e Infrastrukturës dhe Energjisë, mbetet e angazhuar për mbrojtjen e interesave të konsumatorëve shqiptarë dhe garantimin e konkurrencës së ndershme në tregun e karburanteve.
