Përfaqësuesit e Partisë së Lirisë kanë zhvilluar një takim ditën e sotme me përfaqësuesit e Partisë Demokratike në selinë blu. Mësohet se PL-ja është përfaqësuar nga sekretari i Përgjithshëm Tedi Blushi ndërkohë që nga PD-ja është pritur nga Flamur Noka.
Në takimin e sotëm është diskutuar në lidhje me zgjedhjet e 11 majit. Ndërkohë që një pikë tjetër e rëndësishme e bisedës ishte dhe për protestën e 8 shkurtit që do të mbahet në Tiranë.
Më 5 dhjetor Presidenti Bajram Begaj, shpalli datën 11 maj të vitit 2025 për mbajtjen e zgjedhjeve të reja parlamentare. Zyra e Presidencës sqaroi për mediat se Begaj vendosi që të respektojë kërkesën e Komisionit Qendror të Zgjedhjeve në caktimin e datës së zgjedhjeve.
Gjatë konsultimeve që Begaj zhvilloi me krerët e partive politike, data 11 maj ishte propozuar edhe nga Partia Socialiste. Në konsultimet për datën e zgjedhjeve nuk morën pjesë përfaqësuesit e Partisë Demokratike. Përfaqësues të kësaj partie i cilësuan farsë konsultimet e thirrura nga presidenti, pasi sipas tyre, data ishte paracaktuar nga shumica qeverisëse.
