Presidenti i Shteteve të Bashkuara, Donald Trump, ka bërë të ditur se SHBA dhe Ukraina do të nënshkruajnë së shpejti një marrëveshje për mineralet e rralla, të cilat kanë një rëndësi strategjike për industrinë teknologjike dhe mbrojtjen. Gjatë një konference për shtyp në Shtëpinë e Bardhë, Trump deklaroi se përpjekjet e tij për të ndërmjetësuar paqen mes Ukrainës dhe Rusisë po ecin “shumë mirë” dhe se një armëpushim i pjesshëm është arritur. “Jemi duke ecur mirë me Ukrainën dhe Rusinë. Një nga gjërat që po bëjmë është nënshkrimi shumë shpejt i një marrëveshjeje me Ukrainën në lidhje me mineralet e rralla”, tha Trump.
Ndërkohë, luftimet mes dy vendeve vazhdojnë. Forcat ruse kanë kryer një sulm të ashpër me dronë mbi qytetin e Odesës, duke shkaktuar dëme të mëdha në infrastrukturën civile. Sipas guvernatorit rajonal Oleh Kiper, janë goditur një ndërtesë banimi, një qendër tregtare dhe disa dyqane. Tre persona, përfshirë një vajzë, kanë mbetur të plagosur. Nga ana tjetër, në rajonin rus të Kurskut, forcat ukrainase dyshohet se kanë sulmuar një stacion shpërndarjeje të gazit në Sudzha. Mediat ruse publikuan imazhe të një zjarri të madh, ndërsa autoritetet ukrainase nuk kanë komentuar mbi këtë sulm.
Në një lëvizje që ka tensionuar edhe më shumë situatën, presidenti rus Vladimir Putin ka nënshkruar një dekret që detyron qytetarët ukrainas që jetojnë në territoret e pushtuara nga Rusia – përfshirë Donjeckun, Luhanskun, Hersonin dhe Zaporizhjan – të marrin pasaportë ruse deri më 10 shtator ose të largohen nga vendi. Ky vendim është kritikuar ashpër nga Ukraina, e cila e sheh atë si një përpjekje për të forcuar kontrollin rus mbi këto rajone. Ish-ministri i Ekonomisë i Ukrainës, Tymofiy Mylovanov, deklaroi në një postim në platformën X (ish-Twitter) se ky është një ultimatum i rrezikshëm që synon asimilimin e popullsisë ukrainase në territoret e pushtuara.
Ndërkohë, përpjekjet diplomatike për të arritur një marrëveshje më të gjerë vazhdojnë. Trump ka zhvilluar bisedime të ndara me presidentin ukrainas Volodymyr Zelensky dhe atë rus Vladimir Putin në përpjekje për të negociuar një armëpushim më të gjatë. Edhe pse nuk ka arritur një marrëveshje të plotë 30-ditore, bisedimet e tij kanë bërë që Putin të pajtohet për ndalimin e sulmeve ndaj infrastrukturës energjetike për një muaj. Nga ana tjetër, Zelensky ka shprehur gatishmërinë për të pranuar një pauzë të tillë, me shpresën se kjo mund të çojë në negociata të mëtejshme për t’i dhënë fund luftës.
