Tre drejtues automjetesh janë proceduar penalisht në Durrës, pasi tentuan të korruptonin punonjësit e Policisë Rrugore për të shmangur masat administrative për shkeljet e konstatuara gjatë kontrolleve në trafik.
Sipas njoftimit të Policisë, bëhet fjalë për tre shtetas, të cilët u ndaluan për verifikim gjatë monitorimeve të intensifikuara të akseve rrugore në qytetin e Durrësit.
Gjatë kontrollit, 47-vjeçari me inicialet D. H., banues në Durrës, rezultoi se drejtonte automjetin në gjendje të dehur. Ndërsa 50-vjeçari M. Sh., gjithashtu banues në Durrës, kishte certifikatën e kontrollit teknik të automjetit me afat të përfunduar dhe drejtonte një automjet me fuqi motorike më të madhe se ajo e lejuar nga leja e drejtimit që dispononte.
Në rastin e tretë, 23-vjeçari A. S., banues në Kosovë, u konstatua duke përdorur celularin gjatë drejtimit të automjetit.
Për të shmangur ndëshkimin administrativ, tre drejtuesit tentuan t’u ofronin para efektivëve të Policisë Rrugore, përkatësisht 4 mijë, 2 mijë dhe 1 mijë lekë.
Në përfundim të veprimeve procedurale, ndaj të tre shtetasve nisi procedimi penal për veprën penale “Korrupsioni aktiv i personave që ushtrojnë funksione publike”.
Materialet procedurale iu referuan Prokurorisë për veprime të mëtejshme.
