Pedagogët e disa prej universiteteve publike në vend kanë paralajmëruar grevë urie, pasi deri tani qeveria nuk i ka plotësuar kërkesat e tyre.
Ata i kanë lënë dy ditë koh qeverisë dhe nëse nuk marrin zgjidhje do të fillojnë grevën.
Kreu i sindikatës së pedagogëve, Sandër Kovaçi, ftoi kolegët të njoftojnë nëse do të bëhen pjesë e grevës, që do të nisë të mërkurën në orën 16:00.
Ai kishte paralajmëruar grevë edhe pak ditë më parë.
“Nuk duam të përdorim variantin e fundit, atë të grevës, por mund të përdoret për të ushtruar presionin e duhur mbi autoritetet për të reaguar në mënyrë konstruktive dhe ta kuptojnë rëndësinë e këtij bojkoti”, kishte thënë Kovaçi.
Ata kanë filluar protestat prej disa kohësh, ndërsa i kanë bojkotuar tri javët e para të vitit akademik. Kërkesa e tyre kryesore është rritja e pagës me 50% dhe nuk kanë rënë dakord me atë që u ka ofruar qeveria.
