Finalizohet me sukses operacioni policor i koduar “Tuneli”, duke goditur në flagrancë një rast trafikimi të armatimit të rrezikshëm nga Burreli drejt Tiranës. Nga ky operacion është arrestuar një 22-vjeçar me inicialet A. D., banues në Burrel.
Si u realizua operacioni? Shërbimet e policisë kishin në dispozicion informacione të besueshme se një person po transportonte armë zjarri në automjet, nga qyteti i Burrelit drejt Tiranës.
Operacioni u zhvillua në tunelin e Murrizit, ku u ndal automjeti me 22-vjeçarin. Gjatë kontrollit të kryer në bagazh, u zbuluan dy armë zjarri kallashnikov të fshehura dhe 4 krehra për to. Policia sekuestronte gjithashtu mjetin dhe celularin e personit të arrestuar.
Në njoftimin e Policisë thuhet gjithashtu se: “Nga hetimet dyshohet se ky shtetas po i transportonte armët në Tiranë, për t’i shitur për llogari të grupeve kriminale.”
Ndërkohë hetimet janë ende në vijim, me qëllim dokumentimin e plotë të veprimtarisë, si dhe identifikimin e personave të tjerë që mund të jenë përfshirë.
