Kryeministri i vendit, Edi Rama, feston sot 62-vjetorin e lindjes. Ai ka ndarë një mesazh falënderimi në rrjetet sociale për të gjitha urimet e marra gjatë ditës, shoqëruar me një foto të realizuar me Inteligjencë Artificiale.
Kreu i qeverisë shprehet se e ka të pamundur t’u përgjigjet individualisht të gjitha urimeve, ndërsa ka ironizuar komentet negative.
“Faleminderit për urimet e panumërta… e pamundur t’u përgjigjem të gjithave, prandaj po ju përcjell këtu falënderimin, bashkë me ndjesën e mospërgjigjes në telefon. Dhe faleminderit edhe për sharjet që nuk do të mungojnë më poshtë, sepse urrejtësit besnikë janë prova më e sigurtë që nuk po jeton kot”, shkruan ai.
Te fotoja, Rama shfaqet me dorë në zemër, si shenjë përuljeje, i veshur me kostum rozë dhe me një flamingo në krah. Sigurisht, kjo zgjedhje vizuale nuk është rastësore. Lidhet direkt me protestat e zhvilluara prej më shumë se 1 muaji në Tiranë, ku qytetarët përsërisin thirrjet për dorëheqjen e Ramës dhe kabinetit të tij.
Edhe këtë të shtunë, në ditëlindjen e tij, është planifikuar të mbahet tubim madhështor, me pjesëmarrjen e diasporës.
Edi Rama lindi më 4 korrik 1964, në Tiranë. Ai ka një karrierë të gjatë si në politikë, mësimdhënie apo sport. Rama është ish-basketbollist, ish-pedagog, piktor, publicist dhe politikan shqiptar.
Figura kryesore e Partisë Socialiste që prej vitit 2005 dhe i pari lider shqiptar që udhëheq qeverinë prej katër mandatesh tanimë. Në zgjedhjet parlamentare të 11 majit 2025, PS mori një tjetër fitore, me qëllimin kryesor për anëtarësimin e vendit në Bashkimin Europian.
