Një tjetër tentativë vrasjeje që fatmirësisht parandalohet në kohë. Këtë herë në Kurbin!
Siç njoftojnë blutë, krahas pamjeve, një 37-vjeçar ishte përgatitur të hakmerrej për vrasjen e të vëllait, ngjarje kjo e ndodhur më 9 korrik të këtij viti. I arrestuari, me precedentë kriminalë, u ndalua në Fushë-Milot, teksa drejtonte një automjet tip “Mercedes-Benz ML”, të blinduar dhe me targa gjermane.
Gjatë kontrollit, policia i gjeti një armë zjarri automatike tip “Skorpion”, me një krehër me 16 fishekë. Në cilësinë e provës materiale u sekuestruan edhe arma, municioni dhe automjeti.
Operacioni u zhvillua nga specialistët e Sektorit për Hetimin e Krimeve të Rënda, në bashkëpunim me Seksionin Operacional të Hetimit dhe shërbimet e Komisariatit të Policisë Kurbin.
Ndërkohë, vijojnë hetimet për kapjen e autorit të vrasjes së 40-vjeçarit dhe për dokumentimin e plotë të rrethanave të ngjarjes.
40-vjeçari Ilir Lika, i cili mbante edhe disa mbiemra të tjerë, u qëllua me armë zjarri mbrëmjen e 9 korrikut në qytetin e Laçit, pranë apartamentit të tij.
Viktima kishte parkuar makinën disa metra larg banesës, duke ecur në këmbë, dhe më pas është qëlluar të paktën me 7 plumba, njëri prej të cilëve e ka goditur në kokë, duke i shkaktuar vdekjen e menjëhershme. Policia arriti të identifikojë autorin e ekzekutimit të tij, i cili siç e theksuam më herët, është ende në kërkim.
Po ashtu, u zbulua se Lika kishte një të shkuar jo pak problematike.
Nga verifikimet, rezultoi se viktima ishte dënuar më parë me 5 vjet burgim për veprën penale “Kanosja për shkak të detyrës”, si dhe kishte precedent penal për armëmbajtje pa leje. Gjithashtu, ai rezulton se ishte arrestuar në Belgjikë për vjedhje.
