Shefja e politikës së jashtme të Bashkimit Evropian, Kaja Kallas tha se pret që vendet anëtare të BE-së të japin nesër miratimin për një kredi prej 90 miliardë eurosh (106 miliardë dollarë) për Ukrainën.
“Ukraina ka vërtet nevojë për këtë kredi, dhe është gjithashtu një sinjal se Rusia nuk mund ta mbajë më gjatë Ukrainën në këtë luftë. Kjo është jashtëzakonisht e rëndësishme në këtë moment”, tha sot Kallas përpara takimit të ministrave të Jashtëm të BE-së, në Luksemburg.
Kredia u miratua nga liderët e BE-së në dhjetor, por u bllokua për shkak të një mosmarrëveshjeje mes Kievit dhe Budapestit – lidhur me pezullimin e furnizimeve me naftë ruse përmes tubacionit “Druzhba”.
Kryeministri hungarez në largim, Viktor Orbán – i cili humbi zgjedhjet parlamentare – ka akuzuar Ukrainën se ka penguar rifillimin e furnizimeve me naftë ruse përmes këtij tubacioni për arsye politike.
Qeveria në Kiev i ka hedhur poshtë këto akuza, duke theksuar se tubacioni kishte nevojë për riparime pas sulmeve ajrore ruse në janar.
Ministri i Jashtëm gjerman, Johan Wadephul, e cilësoi rezultatin zgjedhor në Hungari si një shpresë të justifikuar për Ukrainën.
“Bllokimi i pazakontë i ndihmës urgjente për Ukrainën duhet të zgjidhet sa më shpejt”, tha ai.
“Shtyrja e lirimit të kredisë prej 90 miliardë eurosh nuk duhet të presë ndryshimin e qeverisë në Hungari, por duhet të ndodhë menjëherë. Për Ukrainën, gjithçka është në rrezik”, theksoi Wadephul.
Orbán ka deklaruar së fundmi se ka marrë sinjale përmes Brukselit se Kievi është i gatshëm të rifillojë furnizimet me naftë, nëse Hungaria heq bllokadën ndaj kredisë së BE-së.
Komisioni Evropian tha se pret që operimi i tubacionit të rifillojë këtë javë, duke rritur shpresat në Evropë se ndihma financiare, e konsideruar thelbësore për Ukrainën, mund të zbatohet.
Tubacioni kalon nga Rusia përmes Bjellorusisë dhe Ukrainës drejt Hungarisë dhe Sllovakisë.
Financimi synon të mbulojë nevojat më urgjente ekonomike dhe ushtarake të Ukrainës dhe të mundësojë vazhdimin e mbrojtjes së saj kundër Rusisë.
Kredia do të financohet përmes obligacioneve të përbashkëta të BE-së, në tregjet e kapitalit dhe do të mbështetet nga hapësira buxhetore në buxhetin afatgjatë të bllokut.
