Biblioteka e Fakultetit të Historisë dhe Filologjisë në Universitetin e Tiranës do të mbajë emrin “Ismail Kadare”, në nder të kolosit të letrave shqipe. Në përkujtim të figurës së tij, në 2-vjetorin e ndarjes nga jeta, u organizua një pritje me miq, bashkëpunëtorë dhe lexues të veprës së Kadaresë. Mes tyre ishte edhe bashkëshortja e shkrimtarit, Elena Kadare, dhe dy vajzat e tij.
Poezi, muzikë dhe kujtime sollën në vëmendje jo vetëm njeriun, por edhe autorin që e bëri letërsinë shqipe pjesë të fondit universal. Përmes veprave si “Gjenerali i ushtrisë së vdekur”, “Kështjella”, “Dimri i madh”, “Pallati i Ëndrrave”, “Kronikë në gur”, “Prilli i thyer” apo “Kukulla”, Kadare i dha zë lirisë, kujtesës, dashurisë, padrejtësisë, pushtetit dhe fatit të njeriut.
Kadare mban urdhrin më të lartë “Nderi i Kombit” dhe është vlerësuar me një sërë çmimesh ndërkombëtare. Në tetor të vitit 2023, presidenti francez Emmanuel Macron, gjatë vizitës në Tiranë, e ngriti në gradën e oficerit të lartë në Urdhrin e Legjionit të Nderit.
