Administratori i FED Invest, Perlat Sulaj, është rizgjedhur anëtar i Bordit të Qendrës së Mikrofinancës (MFC) për një mandat të dytë, duke forcuar përfaqësimin e Shqipërisë në një nga platformat më të rëndësishme ndërkombëtare të sektorit të mikrofinancës.
Rizgjedhja u bë gjatë Konferencës së 28-të Vjetore të Mikrofinancës Ndërkombëtare, e cila këtë vit zhvilloi punimet në Durrës dhe mblodhi mbi 500 përfaqësues nga 40 shtete të botës. Konferenca shërbeu si një platformë diskutimi mbi sfidat dhe zhvillimet e reja të sektorit mikrofinanciar, me fokus te përfshirja financiare, inovacioni dhe mbështetja për bizneset e vogla dhe komunitetet rurale.
Në përfundim të punimeve, anëtarët e MFC-së zgjodhën edhe përbërjen e re të bordit drejtues, me përfaqësues nga vende të ndryshme, ku për të dytin mandat radhazi u rizgjodh Perlat Sulaj, CEO FED Invest.
FED Invest e konsideroi këtë rizgjedhje një vlerësim për kontributin dhe angazhimin e Shqipërisë në zhvillimin e mikrofinancës dhe përfshirjes financiare në rajon dhe më gjerë.
“Jemi jashtëzakonisht krenarë për përfaqësimin në një platformë kaq prestigjioze, duke kontribuar në formësimin e së ardhmes së mikrofinancës së bashku me ekspertë globalë”, thuhet në reagimin e FED Invest pas shpalljes së rezultateve.
