Buxhetit të shëndetësisë dhe mirëqenies sociale për vitin 2026 i shtohen 8.9 miliardë lekë më shumë krahasuar me parashikimin fillestar për të njëjtin vit, duke shënuar rritjen më të madhe për buxhetin e Ministrisë së Shëndetësisë dhe Mirëqenies Sociale.
Sipas Ministrisë së Shëndetësisë dhe Mbrojtjes Sociale, rritja e financimit synon të përmirësojë drejtpërdrejt kujdesin ndaj qytetarëve, cilësinë e shërbimeve shëndetësore dhe mbështetjen sociale për familjet.
Në fokus të kësaj rritjeje, thekson MSHMS është vijimi i politikës së rritjes së pagave në sistemin shëndetësor, e cila nisi të zbatohet në janar të vitit 2026. Gjithashtu, parashikohet vazhdimi i rritjes së pagave për personelin e shërbimit të urgjencës në të gjithë vendin.
Buxheti shtesë do të mbështesë edhe dyfishimin e pagesës së aftësisë së kufizuar për fëmijët, masë që prek drejtpërdrejt 10 240 fëmijë me aftësi të kufizuar.
Një tjetër komponent i rëndësishëm, sipas MSHMS-së është njohja e kontributeve të sigurimeve shoqërore dhe shëndetësore për 14 657 kujdestarë të personave me aftësi të kufizuar, duke forcuar mbështetjen sociale për këtë kategori.
Financimi do të shërbejë edhe për rritjen e investimeve në infrastrukturë dhe pajisje mjekësore, me synim standardizimin dhe modernizimin e shërbimeve spitalore dhe të kujdesit shëndetësor parësor në të gjithë vendin.
