Kryetari i Partisë Demokratike, Sali Berisha, mori pjesë sot në aktivitetin “Zanafilla e Kombit”, në Krujë, një ceremoni përkujtimore me rastin e datëlindjes së Heroit Kombëtar, Gjergj Kastrioti -Skënderbeu.
Në fjalën e tij, Berisha theksoi se “me Skënderbeun lindi liria, lavdia dhe shteti i shqiptarëve”, duke e cilësuar heroin kombëtar si një nga figurat më të mëdha jo vetëm në historinë shqiptare, por edhe në atë botërore.
Sipas Berishës, Skënderbeu me veprën e tij u shndërrua “në shtyllë thelbësore të identitetit kombëtar të shqiptarëve, të qenies së çdo shqiptari. Me Skënderbeun lindi liria e shqiptarëve. Me Skënderbeun lindi lavdia e shqiptarëve”.
Ai u shpreh se Skënderbeu për 25 vite zhvilloi beteja të suksesshme kundër Perandorisë Osmane, duke e cilësuar atë një strateg të jashtëzakonshëm ushtarak dhe një mbrojtës të qytetërimit perëndimor. Sipas Berishës, pa rezistencën e tij, osmanët do të kishin depërtuar më herët në zemër të Evropës.
Gjatë fjalimit, Berisha theksoi gjithashtu se figura e Skënderbeut mbetet një burim frymëzimi për shqiptarët. Sipas tij, qytetarët të frymëzuar nga Skënderbeu duhet të vazhdojnë betejën për “çlirimin e vendit” duke ju referuar qeverisë.
“Ndaj dhe të vazhdojmë ne këtë betejë kundër këtij pushtuesi të egër që ka vendosur mbi shqiptarët një sistem shfrytëzimi kolonial duke vjedhur pasuritë e tyre, duke vjedhur fondet e tyre, duke poshtëruar gjysmën e kombit. Prandaj dhe nderimi i Skënderbeut për çdo shqiptar të vërtetë është detyrim. Ka edhe detyrime dhe përgjegjësi. Miq, po ta përmbledhim me dy fjalë amanetin e prijësit tonë të pavdekshëm, ai është ky për shqiptarin: kurrë mos u dorëzo!
“Ky është frymëzimi i përjetshëm për të gjithë ata që i thonë vetes shqiptar. Ndaj dhe të vazhdojmë ne këtë betejë kundër këtij pushtuesi të egër që ka vendosur mbi shqiptarët një sistem shfrytëzimi kolonial duke vjedhur pasuritë e tyre, duke vjedhur fondet e tyre, duke poshtëruar gjysmën e kombit. Ndaj dhe të frymëzuar nga prijësi ynë i përjetshëm, të vazhdojmë këtë betejë gjer në çlirimin e plotë, gjer në shpëtimin e plotë të Shqipërisë, gjersa të bëjmë qytetarët shqiptarë të liri ashtu si prijësi i tyre i përjetshëm i tyre, Skënderbeu”, tha Berisha.
