Deputetja e Partisë Demokratike, Flutura Açka mbajti sot fjalën e saj të fundit nga Kryesia e Kuvendit si ligjvënëse.
Açka u shpreh se opozita i dhuroi më 11 maj fitoren mazhorancës me Kodin e ri Zgjedhor, gjë që çoi në arrogancë të pushtetit.
“Në javët e fundit të kësaj legjislature seancat tona parlamentare e humbën disi kuptimin ndaj kam hezituar të mbaj fjalën e fundit. Për ne opozitarët seancat kanë humbur kuptimin që me votimin e Kodit të ri Zgjedhor. Jemi ndëshkuar nga shqiptarët për amoralitetin e gatimit të Kodit. Opozitarët që votuan Kodin, lehtësuan fitoren e mazhorancës dhe ia dhuruan me 12 mandate në Kuvend”, tha Açka.
Açka shtoi se “votimi i Kodit diabolik Zgjedhor erdhi pas flirteve me mazhorancën dhe shkeljen e syrit për komisionin anti-SPAK”.
“Ujdia e fshehtë nisi në 2023 me dhënien e grupit parlamentar të PD, për Rithemelimin, Rama zgjodhi opozitën që do të kishte përballë dhe që e mundi me 20 përqind diferencë”, tha Açka.
