7 Marsi, Dita e Mësuesit, festohet në të gjitha institucionet arsimore të Shqipërisë, duke shënuar një moment mirënjohjeje për ata që mbjellin farën e dijes tek brezat e rinj.
Në këtë ditë të veçantë, kryeministri Edi Rama ka përcjellë një mesazh urimi për mësuesit shqiptarë. “Me mirënjohjen për mësueset dhe mësuesit, që me durim dhe përkushtim kultivojnë dijen tek fëmijët e Shqipërisë, ju uroj Gëzuar 7 Marsin”, shkroi Rama, duke e shoqëruar mesazhin me një foto simbolike.
Edhe kryetari i Bashkisë së Tiranës, Erion Veliaj, shprehu vlerësimin e tij për kontributin e mësuesve në edukimin e shoqërisë. “Pavarësisht vendit ku ndodhem, nuk mund të rrija pa ju uruar Gëzuar Ditën e Mësuesit. Do të kisha dashur t’ua shkruaja këto fjalë nga zyra ime, si çdo vit, në krye të punëve të qytetit”, u shpreh ai në një mesazh drejtuar mësuesve.
Policia e Shtetit, përmes një deklarate, nënvizoi rëndësinë e këtij profesioni fisnik, duke theksuar se mësuesit luajnë një rol kyç në formimin e brezave të ardhshëm dhe ndërtimin e një shoqërie më të mirë.
7 Marsi mbetet një ditë simbolike në Shqipëri, ku mësuesit nderohen për përkushtimin dhe sakrificat e tyre në arsim, duke qenë udhërrëfyes të dijes për të ardhmen.
