Protesta të të rinjve raportohen sot edhe në disa qytete të vendit, ndërsa ata i janë bashkuar protestave në Tiranë në shenjë revolte ndaj klasës politike.
Gjatë protestave në Elbasan, Durrës dhe Korçë, të rinjtë marshuan në rrugët e qyteteve me thirrje kundër qeverisë.
Sipas medieve, në Elbasan, protesta u zhvillua me më pak pjesëmarrës se tubimet e mëparshme, ndërsa pranë bashkisë pati momente përplasjesh mes të rinjve dhe efektivëve të policisë.
Në Durrës protesta u shoqërua me incidente. Një grup të rinjsh u grumbulluan fillimisht pranë Pallatit të Kulturës, vijuan marshimin drejt Mauzoleut të Dëshmorëve dhe më pas drejt Postës Shqiptare, ku përmbysën disa kosha mbeturinash dhe goditën derën e institucionit. Pas incidenteve, policia nisi shoqërimin e disa prej të rinjve protestues.
Ndërkohë në Korçë, protestuesit marshuan në pedonale me thirrjet “Bashkohuni me ne” dhe “Edi Rama, jep dorëheqjen”, ndërsa protestës iu bashkua edhe një mësues, i cili bëri thirrje për tubim paqësor.
