Gjykata e Lartë ka rrëzuar rekursin e Arbër Çekajt, pronari i ‘Arbi Garden’, për ngarkesën më të madhe të kokainës që është trafikuar ndonjëherë në vendin tonë, 613 kg kokainë e fshehur në banane, në Shkurt 2018.
Kështu, Gjykata e Lartë ka lënë në fuqi dënimin ndaj Çekajt me 14 vite burg. Ai u dënua me 21 vite nga Apeli i Posaçëm, por për shkak të gjykimit të shkurtuar do të vuajë 14 vite burg.
Arbër Çekaj tentoi edhe të arratisje nga paraburgimi 313, në Gusht të vitit 2021, dhe për këtë çështje ka një tjetër dënim prej 1 viti burg.
Në fuqi u lanë dënimet edhe për dy personat e tjerë të dënuar për trafikun e kokainës, Donaldo Lushajn administratorin e kompanisë dhe Armando Pezakun, shoferin e kamionit, të dënuar respektivisht me 10.8 vite burg dhe 8.8 vite burgim.
