Presioni mbi Gjermaninë po rritet për të furnizuar Ukrainën me tanke luftarake, ndërsa presidenti ukrainas, Volodymyr Zelensky ka kritikuar hezitimin e Berlinit për t’i ofruar Kievit armë më të fuqishme.
“Ju jeni njerëz të rritur. Jeni të mirëpritur të flisni kështu për 6 muaj të tjerë, por njerëzit po vdesin në vendin tonë, çdo ditë”, tha Zelensky për ARD.
“Me një gjuhë të thjeshtë, a mund të na jepni tanke “Leopard” apo jo? Atëherë na i jepni, çfarë prisni?”, tha Zelensky duke i bërë thirrje Berlinit.
“Nuk është se ne po sulmojmë, nëse dikush është i shqetësuar për këtë. Tanket ‘Leopard’ nuk do të kalojnë nëpër Rusi. Ne po mbrohemi”, theksoi ai.
Në të njëjtën kohë, Zelensky theksoi mirënjohjen e Kievit për Berlinin lidhur me ofrimin e ndihmës ushtarake deri më tani.
Kancelari gjerman, Olaf Scholz ka hezituar të marrë një vendim, duke thënë se ai duhej të ndërmerrte të njëjtat hapa me aleatët e NATO-s.
