Presidenti i SHBA-ve, Donald Trump, ka nënshkruar dekretin që rrit tarifat doganore të vendosura për importet e çelikut dhe aluminit, dy sektorë të konsideruar strategjikë, nga 25% në 50%.
“E kam konsideruar të nevojshme rritjen e tarifave doganore për çelikun dhe aluminin në mënyrë që të rregullohen importet për t’u siguruar që ato të mos rrezikojnë sigurinë kombëtare“, thuhet në dekret.
Tarifat e reja prej 50% mbi importet e aluminit dhe çelikut që vijnë nga pjesa tjetër e botës, hynë në fuqi në mesnatë sipas kohës së Washington-it.
Sipas presidentit amerikan “këto tarifa të reja doganore do të jenë më efektive në luftën kundër prodhimit të tepërt me kosto të ulët nga jashtë vendit që dëmton konkurrueshmërinë e industrive të çelikut dhe aluminit të Shteteve të Bashkuara”.
Kevin Dempsey, president i Institutit Amerikan të Hekurit dhe Çelikut, e vlerësoi këtë veprim.
Ai tha se Kina dhe vende të tjera e mbifurnizuan tregun ndërkombëtar, duke e bërë më të vështirë për prodhuesit amerikanë të konkurrojnë.
Por kompanitë që përdorin çelik dhe alumin për të prodhuar produktet e tyre i kritikuan tarifat, duke thënë se ato do të shtonin kosto për konsumatorët amerikanë.
Robert Budway, presidenti i Institutit të Prodhuesve të Kanaçeve, tha se dyfishimi i tarifës së çelikut do të rriste më tej koston e mallrave të konservuara në dyqanin ushqimor.
“Kjo kosto u ngarkohet miliona familjeve amerikane që mbështeten në ushqime të konservuara të mbledhura dhe të paketuara nga fermerët dhe prodhuesit e kanaçeve amerikane”, tha ai.
Të marra së bashku, taktikat tregtare të presidentit kanë rritur shqetësimet për një rënie globale dhe kanë shtuar shqetësimet e Amerikës korporative në lidhje me koston e të bërit biznes.
Ekonomistët kanë theksuar se tarifat mbi inputet e fabrikave, të tilla si metalet, rrezikojnë të ngadalësojnë prodhimin amerikan, pasi ato rrisin çmimet për fabrikat.
Duke shtuar koston e prodhimit të makinave, shpimit për naftë dhe ndërtimit të qendrave të të dhënave, tarifat më të larta të çelikut mund të ngadalësojnë qëllimet e tjera të administratës Trump.
Supertaksa prej 25% për importet e çelikut dhe aluminit nga Shtetet e Bashkuara hyri në fuqi në mesin e marsit të këtij viti.
Ishte një nga vendimet e para për këtë çështje nga Donald Trump pas kthimit të tij në Shtëpinë e Bardhë.
Komisioni Evropian reagoi menjëherë, duke e dënuar “fortësisht” këtë vendim i cili minon “përpjekjet e vazhdueshme për të arritur një zgjidhje të negociuar” me Shtetet e Bashkuara.
Kanadaja, furnizuesi më i madh i Shteteve të Bashkuara, paraqiti një ankesë në Organizatën Botërore të Tregtisë (OBT) më 13 mars, e cila i quajti këto masa “të papajtueshme me detyrimet e Shteteve të Bashkuara” në aspektin e tregtisë ndërkombëtare.
Qeveritë e huaja janë zemëruar nga ideja se eksportet e tyre të çelikut përbëjnë një kërcënim për sigurinë kombëtare për Shtetet e Bashkuara, pjesërisht sepse kërkesa amerikane për këto metale tejkalon shumë aftësinë aktuale të vendit për t’i prodhuar ato.
Shtetet e Bashkuara importojnë shumë pak çelik direkt nga Kina për shkak të tarifave që ishin në fuqi më parë.
Por industria e çelikut në SHBA argumenton se prodhimi masiv i çelikut në Kinë ul çmimin e metalit në nivel global, duke e bërë më të vështirë për fabrikat amerikane të konkurrojnë.
Kanadaja është furnizuesi më i madh i huaj si i çelikut ashtu edhe i aluminit në Shtetet e Bashkuara. Meksika, Brazili, Koreja e Jugut dhe Gjermania janë gjithashtu furnizues të mëdhenj të çelikut, ndërsa Emiratet e Bashkuara Arabe, Kina dhe Koreja e Jugut furnizojnë Shtetet e Bashkuara me sasi të vogla alumini.
