Presidenti amerikan Donald Trump ka deklaruar se është “shumë krenar” për arritjen e një armëpushimi mes Izraelit dhe Iranit, duke e cilësuar atë si një zhvillim “shumë të mirë”.
Gjatë një konference për shtyp në samitin e NATO-s në Hagë, Trump vlerësoi palët për vetëpërmbajtjen, ndërsa komentoi edhe mbi efektivitetin e sulmeve ajrore të SHBA-ve ndaj objekteve bërthamore iraniane.
Duke iu përgjigjur pyetjeve të gazetarëve lidhur me raportet e inteligjencës amerikane që sugjerojnë se objektet nuk u shkatërruan plotësisht, Trump u shpreh me vendosmëri.
“Besoj se ishte një shkatërrim virtualisht total. Ata nuk patën kohë të shpëtonin asgjë, sepse ne vepruam shumë shpejt. Është shumë e vështirë dhe e rrezikshme të zhvendosësh atë lloj materiali”.
I pyetur mbi kërcënimet e Iranit për të vijuar me pasurimin e uraniumit, Trump u përgjigj: “Gjëja e fundit që duan të bëjnë tani është të pasurojnë diçka. Ata kanë nevojë të rimarrin veten. Ne nuk do t’i lejojmë ta bëjnë këtë.”
Deklaratat e Presidentit amerikan vijnë pas një periudhe tensionesh të larta në rajon dhe ndërhyrjeve ushtarake të drejtpërdrejta të SHBA-së ndaj infrastrukturës bërthamore të Iranit.
