Tirana vazhdon me përforcimet në merkato. Klubi bardheblu ka gjetur pasuesin Florian Përgjonit, i cili nuk rinovoi dhe kaloi te skuadra e Teutës.
Për krahun e majtë të mbrojtjes, kryeqytetasit kanë firmosur me një lojtar grek. Bëhet fjalë për Georgios Valerianos.
33-vjeçari ka dalë nga të rinjtë e Olympiacos, ndërsa ka luajtur për disa ekipe në vendlindje, por edhe në Qipro.
Për Valerianos kjo do të jetë aventura e parë në Shqipëri dhe shpreson të lërë shenjë.
“Zyrtare: Georgios Valerianos është bardheblu! KF Tirana mirëpret mbrojtësin e majtë Georgios Valerianos, i cili i bashkohet skuadrës sonë për sezonin e ri!
Me një karrierë solide në elitën e futbollit grek dhe përvoja ndërkombëtare, Valerianos vjen për të shtuar forcë, përvojë dhe karakter në repartin difensiv të skuadrës sonë.
Ish-lojtar i skuadrave si Aris, Olympiakos Volou, AEL dhe më gjerë, Georgios është gati të shkruajë kapitullin e radhës në kryeqytet! Mirë se erdhe Georgios! Bardheblutë janë shtëpia jote e re”, thuhet në njoftimin e klubit.
