Operatori i rrjetit elektrik të Spanjës ka mohuar se energjia diellore është shkaku kryesor për ndërprerjen më të rëndë të energjisë elektrike në vend.
Ndërsa jeta u rikthye në normalitet pas një ndërprerjeje të energjisë që ndaloi trenat, mbylli aeroportet dhe bllokoi njerëzit në ashensorë, kundërshtarët e Sanchez e drejtuan gishtin nga investimet e pakëta në një sistem që mbështetet gjithnjë e më shumë në energjinë diellore dhe të erës.
Kryeministri Pedro Sanchez përballet me presion në rritje për të shpjeguar se çfarë shkoi keq. Sanchez ka njoftuar një hetim zyrtar dhe tha se po kërkonte përgjigje nga kompanitë private të energjisë që furnizojnë rrjetin me energji. Kundërshtarët e Sanchez kanë bërë thirrje që një hetim i pavarur të kryhet nga parlamenti i Spanjës në vend të hetimit qeveritar. Kryeministri spanjoll është shprehur gjithashtu se nuk e ka përjashtuar një sulm kibernetik, megjithëse kjo është hedhur poshtë nga operatori i rrjetit Red Electrica de Espana.
Operatori i rrjetit Red Electrica de Espana ka bërë të ditur se ende nuk e ka identifikuar vendndodhjen e saktë të burimit të ndërprerjes dhe se është shumë herët për të nxjerrë përfundime. Pak para se sistemi të binte, energjia diellore përbënte 53% të prodhimit të energjisë elektrike, era pothuajse 11% dhe energjia bërthamore dhe gazi 15%.
Sipas Red Electrica de Espana, pjesa e burimeve të rinovueshme si burim i prodhimit të energjisë elektrike në Spanjë është rritur në 56% në vitin 2024 nga 43%. Ministrja e Energjisë Sara Aagesen tha se qeveria u kishte dhënë kompanive të energjisë një afat të fundit për të ofruar të dhëna kur sistemi të hënën përjetoi një humbje të madhe të gjenerimit, duke shkaktuar një shkëputje nga pjesa tjetër e Evropës.
Red Electrica de Espana paralajmëroi në maj 2024 për rreziqet e një ndërprerjeje të madhe. Burimet e rinovueshme janë të shpërndara në të gjithë territorin e vendit dhe lidhen me nënstacione që nuk janë projektuar për të përballuar vëllime të larta të gjenerimit.
