Milorad Dodik, të cilit iu hoq mandati si president i Republikës Srpska, ka thënë se nuk do ta respektojë vendimin dhe do të mbetet president i atij entiteti të Bosnjës dhe Hercegovinës.
“Unë nuk do ta respektoj atë vendim. Do ta respektoj vullnetin e popullit serb. Ju ishit arrogantë dhe prisnit që unë të jem i nënshtruar. Nuk do të jem. Unë jam president i Republikës Serbe, dhe ju shkruani çfarë të doni. Unë u zgjodha nga populli, nuk do të zëvendësohem nga një qeveri e huaj.”, tha Dodik.
Dodik ka shtuar se ata që morën vendimin “nuk e respektuan Kushtetutën e Bosnje-Hercegovinës dhe të RS-së.”
Vendimi i fundit për heqjen e mandatit presidencial për Dodik erdhi pasi Gjykata e Apelit e Bosnje-Hercegovinës e shpalli atë fajtor për shkelje të ligjit dhe hodhi poshtë ankesën e tij kundër vendimit të Komisionit Qendror të Zgjedhjeve.
