Presidentja e Bankës Qendrore Evropiane (BQE), Christine Lagarde, do të largohet nga detyra më 7 shkurt 2027, rreth nëntë muaj para përfundimit të mandatit të saj tetëvjeçar, njoftoi sot institucioni.
Sipas njoftimit zyrtar të BQE-së, Lagarde informoi Këshillin Drejtues të bankës dhe presidentin e Këshillit Evropian, António Costa, për vendimin e saj. Mandati i saj pritej të përfundonte më 31 tetor 2027.
Largimi i parakohshëm hap procesin për zgjedhjen e pasuesit të saj në krye të institucionit, i cili luan një rol kyç në përcaktimin e politikës monetare dhe të normave të interesit për vendet e eurozonës.
Pasuesi i Lagarde-s do të emërohet nga Këshilli Evropian, në përputhje me procedurat e përcaktuara në Traktatin për Funksionimin e Bashkimit Evropian.
Vendimi vjen në një periudhë kur pritet të ndryshojnë disa pozicione të rëndësishme drejtuese në BQE. Mandati i kryeekonomistit Philip Lane përfundon në maj 2027, ndërsa anëtarja e Bordit Ekzekutiv, Isabel Schnabel, pritet të largohet nga detyra në fillim të janarit 2027.
Largimi i Lagarde-s përpara zgjedhjeve presidenciale në Francë, të planifikuara për vitin 2027, ka nxitur diskutime mbi ndikimin që zhvillimet politike evropiane mund të kenë në procesin e përzgjedhjes së drejtuesit të ardhshëm të BQE-së.
Mes emrave të përmendur në diskutimet për pasuesin e saj janë ish-guvernatori i Bankës Qendrore të Holandës, Klaas Knot, dhe drejtori i përgjithshëm i Bankës për Shlyerjet Ndërkombëtare, Pablo Hernández de Cos, ish-guvernator i Bankës së Spanjës.
Christine Lagarde mori drejtimin e BQE-së më 1 nëntor 2019, pas një karriere në krye të Fondit Monetar Ndërkombëtar. Gjatë drejtimit të saj, institucioni u përball me sfida të rëndësishme ekonomike, përfshirë pandeminë COVID-19, rritjen e inflacionit dhe pasojat ekonomike të luftës në Ukrainë.
Në një reagim pas njoftimit, Lagarde e cilësoi shërbimin në krye të institucionit si një privilegj dhe shprehu besimin se BQE-ja është e përgatitur për të ardhmen.
