Administrata Doganore Shqiptare bllokoi një ngarkesë me 156 mijë njësi produkte ushqimore dhe lodra për fëmijë, me peshë mbi 2,1 tonë, pasi gjatë kontrolleve në Degën Doganore Tiranë u konstatuan parregullsi në përmbushjen e kërkesave ligjore për etiketimin.
Sipas njoftimit të Doganës, gjatë kontrollit fizik të mallrave u evidentua mungesa e informacionit për datën e jetëgjatësisë minimale ose afatin e përdorimit në etiketimin e produkteve përfundimtare.
Kontrolli u krye në bazë të analizës së riskut nga Dega Doganore Tiranë, në bashkëpunim me Sektorin e Monitorimit pranë Drejtorisë së Përgjithshme të Doganave. Parregullsitë e konstatuara lidhen me kërkesat e përcaktuara në Vendimin e Këshillit të Ministrave datë 11 korrik 2018, “Për etiketimin e ushqimeve dhe informimin e konsumatorit”.
Për këtë rast, Drejtori i Përgjithshëm i Doganave, Besmir Beja, kërkoi angazhimin maksimal të strukturave përgjegjëse për kryerjen e verifikimeve dhe vijimin e procedurave ligjore.
Autoritetet doganore vendosën bllokimin e ngarkesës dhe mosçlirimin e mallrave deri në përfundimin e verifikimeve dhe procedurave përkatëse.
Administrata Doganore Shqiptare bëri të ditur se do të vijojë kontrollet ndaj mallrave të importuara, me synim parandalimin e vendosjes në treg të produkteve që nuk përmbushin kërkesat ligjore dhe garantimin e mbrojtjes së konsumatorëve.
