Pas vendimit të Gjykatës së Posaçme Kundër Korrupsionit dhe Krimit të Organizuar (GJKKO), autoritetet kanë sekuestruar sot pasuritë e Redjan Rrajas, i dënuar me burgim të përjetshëm për atentatin ndaj ish-prokurorit Ardjan Ndoji, ku humbi jetën shoferi i tij, Andi Maloku.
Operacioni u realizua nga Seksioni për Hetimin e Pastrimit të Parave dhe Aseteve Kriminale, në bashkëpunim me Agjencinë e Administrimit të Aseteve të Sekuestruara dhe Konfiskuara. Gjatë aksionit, u sekuestruan disa pasuri, përfshirë një automjet që i përket modeles Kejvina Kthella dhe tre prona të regjistruara në emër të Marsela Çiçës, të cilat dyshohet se janë kontrolluar nga Rraja.
Vlera e përgjithshme e pasurive të konfiskuara arrin në rreth 1 milion euro. Këto pasuri do të kalojnë në pronësi të shtetit dhe janë dorëzuar për administrim nga Agjencia e Administrimit të Aseteve të Sekuestruara dhe Konfiskuara.
Materialet në lidhje me këtë operacion i janë dorëzuar Prokurorisë së Posaçme për hetime të mëtejshme. Ky veprim përbën një tjetër hap të rëndësishëm në luftën kundër krimit të organizuar dhe pastrimit të parave në Shqipëri.
