Zëvendëskryeministrja Albana Koçiu akuzoi kreun e Partisë Demokratike, Sali Berisha, për përfshirjen e të rinjve dhe të miturve në akte të dhunshme gjatë protestave.
Përmes një postimi në rrjetet sociale, Koçiu ndau pamje ku, shihen disa të rinj të shoqëruar nga kandidatja e PD-së për deputete, Ilirjana Kuçana, të cilët mbajnë në çanta bombula zjarri.
“Mos e prek studentin me dorë, por armatos të mitur si mercenarë dhe nisi si mish për top”, shkroi Koçiu, duke akuzuar opozitën se po përdor të rinjtë për qëllimet e saj politike.
Ajo theksoi se, “kjo është e vetmja strategji e një opozite të falimentuar moralisht dhe politikisht”.
Zëvendëskryeministrja shtoi se përpjekjet për ta kthyer vendin në kaos dhe dhunë nuk do të kenë sukses.
“Sado të përpiqet Saliu dhe çeta e tij huligane, që nuk heziton të shfrytëzojë as të miturit për hallin e tyre, Shqipëria
nuk do të kthehet më kurrë pas në flakë, kaos e në tym”, deklaroi Koçiu.
Zëvendëskryeministrja theksoi se të rinjve duhet t’u ofrohen mundësi zhvillimi dhe perspektivë europiane, në vend të përfshirjes në akte dhune.
“Detyra jonë është t’u japim të rinjve aspiratën e Shqipërisë Europiane, hapësirat e zhvillimit dhe mundësitë e së ardhmes, jo shishen me benzinë e molotovin e së shkuarës”, përfundoi Zëvendëskryeministrja Albana Koçiu.
