Pas eklipsit total diellor të 12 gushtit, qielli i gushtit sjell një tjetër spektakël astronomik: eklipsin e pjesshëm të Hënës, i cili do të jetë i dukshëm në orët e para të mëngjesit të 28 gushtit.
Eklipsi pritet të nisë rreth orës 04:40, ndërsa maksimumi do të arrihet rreth orës 06:10.
Në këtë fazë, më shumë se 90% e diskut të Hënës do të jetë i zhytur në hijen e Tokës, duke i dhënë satelitit natyror një ngjyrë karakteristike të kuqërremtë.
Astrofotografja italiane Alessandra Masi shpjegon se eklipsi i 28 gushtit dhe ai diellor i 12 gushtit i përkasin të njëjtës sezon eklipsesh.
Këto periudha krijohen kur Dielli ndodhet pranë nyjeve të orbitës së Hënës, duke bërë të mundur shfaqjen e dy eklipseve të ndara nga rreth dy javë.
Ndryshe nga eklipsi diellor, këtë herë është Hëna ajo që kalon në hijen e Tokës.
Gjatë një eklipsi hënor, sateliti nuk zhduket plotësisht në errësirë, por mund të marrë nuanca që variojnë nga bakri i artë deri te e kuqja e errët.
Ky fenomen njihet gjerësisht si “Hëna e gjakut” dhe lidhet me mënyrën se si atmosfera e Tokës filtron dhe shpërndan dritën e diellit.
Në momentin e maksimumit, Hëna do të jetë shumë pranë horizontit perëndimor, duke krijuar mundësi interesante për fotografi ku ajo mund të fiksohet së bashku me male, ndërtesa apo elementë të tjerë të peizazhit.
Megjithatë, drita e agimit mund ta bëjë më të vështirë fotografimin, për shkak të kontrastit më të ulët mes Hënës dhe qiellit.
Nga ana tjetër, pikërisht kjo gjendje mund të sjellë pamje të veçanta dhe spektakolare.
Eklipsi hënor i 28 gushtit do të jetë kështu ngjarja e dytë madhore astronomike e këtij muaji, duke përmbyllur një periudhë të jashtëzakonshme për vëzhguesit e qiellit.
