Një tjetër shembje rruge është regjistruar, këtë herë në Qarkun e Elbasanit. Rruga pranë liqenit të Gjinarit, një nga pikat më strategjike për turizmin malor në bashkinë e Elbasanit, po përballet me një degradim të rëndë infrastrukturor.
Reshjet e fundit dhe paqëndrueshmëria e terrenit kanë shkaktuar rrëshqitje masive të dherave, duke dëmtuar rëndë shtresën asfalti dhe duke krijuar disnivele të rrezikshme për qarkullimin.
Aksi, i cili sipas kontratave në fuqi duhet të mirëmbahet nga kompania “Alko Impex Construction”, aktualisht paraqet një kërcënim serioz për sigurinë rrugore. Ky segment është jetik për banorët e zonës, pasi shërben si arterie kryesore që lidh disa fshatra të Gjinarit me qytetin.
Çdo ditë, dhjetëra automjete private dhe mjete transporti kalojnë në këtë pjesë ku asfalti është i thërrmuar, duke rrezikuar jo vetëm dëmtimin e mjeteve, por edhe jetën e pasagjerëve.
Gjinari, i shpallur si fshat turistik, po vuan pasojat e një infrastrukture gjysmë-funksionale. Ekspertët e mjedisit dhe banorët paralajmërojnë se nëse nuk ndërhyhet në kohë për stabilizimin e terrenit, kostoja e riparimit do të jetë shumë më e lartë në të ardhmen.
Komuniteti i zonës kërkon masa të menjëhershme nga institucionet përgjegjëse. Me afrimin e sezonit pranveror dhe veror, kur fluksi i vizitorëve vendorë dhe të huaj drejt Gjinarit rritet ndjeshëm, rehabilitimi i këtij aksi është i domosdoshëm.
