Kryetari i Partisë i Demokratike, Sali Berisha ka reaguar sot për plehrat e depozituara në fushën e Sharrës ku thekson se në 6 vite nuk është djegur asnjë kg pleh.
Në një dalje për mediet, Berisha tha se, “Sharra është një minierë floriri e Ramës dhe e Veliajt dhe bashkë kanë vjedhur 54 mln euro”.
“Kompania e Ramës dhe Veliajt ka një kontratë për fushën e Sharrës. Aty thuhet se për çdo ton plehrash të depozituar në fushën e Sharrës, bashkitë do paguajnë 11 euro nëse ato nuk digjen dhe do paguajnë 29 euro në rast se ato digjen”, u shpreh Berisha.
Berisha tha se, “SKAP-i i partisë është mbuluar nga plehrat e qeverisë”.
“E vërteta është se çdo i ashtuquajtur OPGJ, apo BKH, apo SKAP-ist, mjafton të merrte një automjet dhe të shkonte në Sharrë të konstatonte se si Edi Rama dhe Erion Veliaj presin çdo ditë para dhe euro për kontot e tyre”, u shpreh ai.
Berisha u ka bërë thirrje qytetarëve që të ngrihemi kundër qeverisës që sipas tij “nuk ndalet para asgjëje, që mbulohet nga ajo drejtësi e cila është shndërruar e tëra në një bashkëpunëtore të rrezikshme në vjedhje e krim të qeverisë shqiptare”.
“Qytetarë dhe qytetare, shpresa e vetme jeni ju, është zëri juaj, është revolucioni juaj. Kjo qeveri po bllokon çdo mekanizëm të hetimit të saj dhe ka hapur dyert për vjedhjen tuaj ditën e natën. Unë kam besim të madh se ftesës së opozitës, qytetarët do i përgjigjen me vendosmërinë më të madhe”, tha ai.
