Presidenti i Republikës, Bajram Begaj përshëndeti sot hapjen e grup-kapitullit 4 në Konferencën Ndërqeveritare Shqipëri-Bashkimi Europian të mbajtur në Bruksel.
Grup-kapitulli 4 përfshin sektorë thelbësorë të Marrëveshjes së Gjelbër Evropiane.
Presidenti Begaj vlerësoi rëndësinë e këtij akti, duke e cilësuar si një hap të rëndësishëm në rrugën e anëtarësimit të plotë të Shqipërisë në Bashkimin Evropian.
Kreu i Shtetit shprehu besimin se me këtë ritëm progresi, brenda vitit do të finalizohet hapja e të gjithë kapitujve të negociatave me Bashkimin Evropian.
“Një tjetër hap shumë i rëndësishëm në procesin e anëtarësimit të plotë evropian. Sot Shqipëria hapi negociatat për grup-kapitullin 4: Agjenda e Gjelbër dhe Lidhshmëria e Qëndrueshme. Me këtë ritëm, Shqipëria drejt realizimit të objektivit të saj për të hapur gjithë grup-kapitujt e negociatave brenda vitit”, vlerësoi Presidenti Begaj.
