Një aksident i rëndë është regjistruar mëngjesin e së premtes në lindje të Francës, pranë kufirit me Zvicrën, ku një autobus është përfshirë në një aksident rrugor, duke shkaktuar disa viktima, sipas autoriteteve lokale.
Siç raporton agjencia e lajmeve Reuters, ministri francez i Arsimit, Edouard Geffray, deklaroi se autobusi dyshohet se po transportonte nxënës, ndërsa prefektura lokale bëri të ditur se bëhej fjalë për një autobus ndërqytetës.
Pamjet e transmetuara nga televizioni francez BFM TV tregojnë një autobus që është aksidentuar në një kanal në anë të rrugës, ndërsa një grup njerëzish qëndronin jashtë tij.
Sipas BFM TV, nga aksidenti raportohet se kanë humbur jetën dy persona, edhe pse një zëdhënës i shërbimit të mbrojtjes civile deklaroi se ky informacion nuk mund të konfirmohej ende. Edhe prefektura lokale tha se ende nuk kishte konfirmim zyrtar për persona të vdekur.
Ministri francez i Transportit, Philippe Tabarot, njoftoi se ishte nisur drejt vendngjarjes.
