Gjykata e Posaçme e Apelit ka ndryshuar masën e sigurisë ndaj Emro Sulejmanit, kryekamerier i një lokali pranë rezidencave qeveritare në Durrës, duke urdhëruar lirimin e tij të menjëhershëm, nëse nuk mbahet për ndonjë shkak tjetër ligjor.
Bëhet me dije se në vendimin e shpallur më 3 nëntor 2026, gjykata ka caktuar ndaj tij dy masa sigurie: ndalimin e daljes jashtë shtetit dhe detyrimin për t’u paraqitur në policinë gjyqësore.
Sipas vendimit, Sulejmani nuk mund të largohet nga territori i Shqipërisë pa autorizimin paraprak të gjykatës dhe nuk mund të përdorë dokumentet e identifikimit për të dalë jashtë vendit pa këtë autorizim.
Gjithashtu, ai duhet të paraqitet të hënën e parë dhe të tretë të çdo muaji, në orën 09:00, pranë oficerit të policisë gjyqësore që heton çështjen, si dhe sa herë të thirret nga organet proceduese.
Ndërkohë, për Fatjon Kalluçin, ish Shefi i Sektorit të Administrimit të Provave në Institutin e Policisë Shkencore, Gjykata e Posaçme e Apelit ka lënë në fuqi vendimin nr. 70, datë 24 shtator 2026, të Gjykatës së Posaçme të Shkallës së Parë, sa u përket masave të sigurisë të caktuara ndaj tij.
Në vendimin e firmosur nga gjyqtari Florjan Kalaja, është urdhëruar Prokuroria e Posaçme (SPAK) për ekzekutimin e tij.
Gjykata ka vendosur gjithashtu ndalimin e publikimit të vendimit deri në përfundimin e hetimeve paraprake, në bazë të nenit 103 të Kodit të Procedurës Penale.
Kundër këtij vendimi mund të bëhet rekurs në Gjykatën e Lartë brenda 45 ditëve nga e nesërmja e njoftimit të vendimit të arsyetuar.
Kujtojmë se Sulejmani dhe Kalluçi akuzohen në dosjen e ish-drejtueses së SHISH, Vlora Hysenit.
