Kuvendi pritet që të miratojë sot më 8 tetor reformën e re territoriale, për të cilën nevojiten 84 vota.
Ndërsa parlamenti do të votojë për Territorialen dhe për disa nisma të tjera, jashtë pritet të zhvillohen protesta.
Protestat janë thirrur nga Partia Demokratike, por se do të protestojnë edhe ata që konsiderohen si “protestuesit flamingo”.
Berisha: Rama refuzoi mocionin me debat për skandalin e SHISH
Kryetari i Partisë Demokratike, Sali Berisha, akuzoi mazhorancën se ka refuzuar mocionin me debat për skandalin në SHISH.
Nga foltorja e Kuvendit, Berisha e cilësoi vendimin si “antikushtetues” dhe pretendoi se drejtuesja e shërbimit është implikuar në veprimtari kriminale.
Ai akuzoi gjithashtu mazhorancën se, duke bllokuar mocionin, po mbron persona të lidhur me këto pretendime. Berisha ngriti akuza edhe ndaj Vlora Hysenit, duke deklaruar se ajo u emërua këshilltare e kryeministrit Edi Rama me rekomandimin e presidentit serb Aleksandar Vuçiç.
Sipas tij, pas emërimit në krye të SHISH, Hyseni udhëtoi drejt Beogradit.
“Në një akt antikushtetues, të pashembullt, padrinoja i vendit urdhëroi shkëmbimin e të drejtës kushtetues të opozitës, të deputetëve për mocion me debat për skandalin më të rëndë në historinë 100 e sa vjeçare të shtetit shqiptar, implikimin dikrekt të shefes së shërbimit në veprimtarinë kriminale me kartelet më të rrezikshëm të drogës në Europë, nëpërmjet koordinatorit të këtyre karteleve Ergys Agasit. Që ju të bllokoni një mocion të tillë, identifikoni veten, dëshmoni se çfarë jeni. Ju jeni anëtarë të klubit Agasi. Ju jeni anëtarë të organizatave. Vlora Hyseni, ta dinë shqiptarët u emërua këshilltare e padrinos me rekomandim direkt të Aleksandar Vuçiç, u emërua pasi presidenti dhe qeveria e Kosovës e shkarkuan atë si të padenjë për detyrën që i kishin besuar. Vlora Hyseni pasi u emërua shkoi në Beograd“, tha ai.
Taulant Balla: Njëherë, dua të them se Andi Lila është futbollist dhe jo kompozitor, se ia ngatërroi emrin zotëria këtu. Lila është një person i nderuar.
Si më i vjetri në këtë sallë, duhet të mos e përdorje atë mënxyrë, ku vajza e gra ndihen të fyera dhe besoj se gratë në parlament duhet të solidarizohen me gratë e përfshira. Kushdo që është mbrapa atyre videove, duhet të kërkohet dhe të shkojë përpara drejtësisë.
Ne e konsiderojmë SPAK-un si suksesin e drejtësisë së re, kurse zotëria e quan seksionin e PS-së. Zotëria thotë se kur më heton mua, SPAK është kështu e ashtu. Ka dhe hipokrizi, se vjen këtu dhe thotë “bazuar në informacionet e dosjeve”. Unë kam thënë se do jenë para drejtësisë ish-kryeministra, ish-ministra, ish-funksionarë publikë etj.
Qëndrimi ynë është që drejtësia e re ka punën e vet dhe politika të vetën. Kush që ka çështje, të shkojë tek SPAK. Ne besojmë tek organet e pavarura të drejtësisë.
Qëndrimi ynë ka qenë dhe mbetet, që një zyrtar është i pafajshëm, derisa të provohet fajësia. Qëndrimi ynë është që secili të marrë avokatin, bëni dhe ju si ne, mos e bëni partinë avokate.
Gazment Bardhi: Policia të ndalë aktet e dhunës ndaj protestuesve. Është e papranueshme që policia të përdoret si polici politike.
Të ndalin menjëherë dhunën ndaj qytetarëve dhe t’u garantojnë atyre protestën paqësore. Shumica janë qytetarë nga zonat e juaja elektorale, që kundërshtojnë hartën e re shpopulluese. Është e papranueshme që ne rrimë brenda dhe ushtrojmë detyrën tonë, ndërsa qytetarët tanë pengohen që të protestojnë.
Ju refuzuat interpelancën e 11-të me kryeministrin dhe kjo është turp, që kreu i qeverisë është kthyer në karton.
