Kryeministri Edi Rama bëri të ditur sot se thirrja për rrjetin MIA u mbyll me një sukses absolut, duke regjistruar 245 aplikime.
Në një postim në rrjetet sociale, Rama informoi se aplikimet vijnë nga ekselentë të sapodiplomuar, gazetarë, informaticienë, organizata mediatike, studio dizajni grafik, dhe të tjerë akoma.
Kryeministri informoi se kanë ardhur ide për ta bërë më të thjeshtë gjuhën e shtetit, më të kuptueshëm informacionin për qytetarët, më sistematike videot informatike, më prezente inteligjencën artificiale dhe më kreativ në formate rrjetin MIA.
“Dhe këtu lind pyetja e madhe: Si ka mundësi gjithë kjo dëshirë për të punuar me ‘agjencinë e propagandës së regjimit’? Ose ‘regjimi’ e ka harruar fare zanatin e terrorit, ose propaganda e ‘regjimit’ ka dështuar ose pastaj përralla e ‘regjimit’ nuk bind më as ata që e tregojnë çdo ditë”, u shpreh Rama.
