Reshjet e dendura të shiut kanë përfshirë pjesën më të madhe të vendit prej ditës së djeshme.
Në Pukë, shirat e dendur kanë shkaktuar dëme në disa akse rurale.
Në disa fshatra raportohen të dëmtuara ura, linja ujësjellësi dhe mullinj bloje.
Nga ana e institucioneve lokale po merren masa për kthimin në normalitet.
LEZHË
Reshjet e shiut të rëna që prej pasdites së djeshme kanë bërë që të ketë rrëshqitje dherash. Aksi Rrëshen-Bukmirë në zonën e Mirditës ka pësuar rrëshqitje në një pjesë të tij si pasojë e vërshimit të ujërave si dhe inertet, por rruga vijon të jetë e kalueshme për automjetet.
SHKODËR
Në bashkinë Shkodër nga reshjet nuk ka dëme. Vetëm në rrugën e Dukagjinit ka pasur rrëshqitje dherash e gurësh për të cilat do të punohet sot përmes një fadrome për largimin e tyre.
Ndërkohë në Theth një natë më parë pati prurje të shumta të lumit të Shalës, por pa pasoja të rënda.
Ura që lidh fshatin Theth me Ndërlysaj nuk është dëmtuar nga reshjet, por firma që po punon për rrugën e re atje, ka ndërhyrë pasi do të bëjë rikonstruksionin e plotë të urës.
Në pjesën tjetër të njësite nuk raportohen dëme, por në disa zona ka pasur shkëputje të energjisë si pasojë e linjave të amortizuara.
