Autoritetet franceze vijuan përpjekjet për të vënë nën kontroll një zjarr masiv pranë Bordosë, ndërsa parashikimet për një tjetër valë të nxehti kërcënojnë të përkeqësojnë situatën.
Ndërkohë, kryeministri spanjoll Pedro Sánchez paralajmëroi se Spanja dhe gadishulli Iberik po përballen me pasojat e ndryshimeve klimatike.
“I gjithë gadishulli Iberik po përjeton pasojat e emergjencës klimatike në një mënyrë shumë specifike”, tha Sánchez.
Erërat e forta gjatë natës së të shtunës vështirësuan përpjekjet për shuarjen e zjarrit në rajonin Gironde, në jugperëndim të Francës. Flakët kanë përfshirë një sipërfaqe katër herë më të madhe se Parisi dhe kanë detyruar rreth 220 mijë persona të largohen nga banesat e tyre.
Në Spanjë, zjarret në perëndim të Madridit po viheshin nën kontroll, por Sánchez foli të dielën për “orë të vështira”.
“Po përballemi me disa orë të vështira, megjithëse është e vërtetë që përditësimi i fundit tregoi se nata e kaluar ishte shumë pozitive sa i përket zhvillimit të zjarrit dhe përpjekjeve për ta kontrolluar atë”, tha Pedro Sánchez.
Meteorologët parashikojnë se një tjetër valë e të nxehtit mund të godasë Francën nga e marta, me temperatura që në disa zona mund të arrijnë deri në 40 gradë Celsius.
Zjarret kanë detyruar rreth 375 mijë persona të largohen nga shtëpitë e tyre në Francë dhe Spanjë. Në Francë, afro 260 mijë njerëz janë evakuuar, ndërsa në Spanjën fqinje rreth 116 mijë persona janë larguar nga zonat e rrezikuara gjatë kësaj jave.
Kryebashkiaku i Bordosë, Thomas Cazenave, e përshkroi zjarrin në Gironde si një situatë “në portat e zonës metropolitane”, rreth 25-30 kilometra larg qytetit, i cili ka një popullsi prej 268 mijë banorësh. Ai tha se evakuimi i qytetit nuk është në plan.
Situata e zjarrit në Gironde mbeti “përgjithësisht e qëndrueshme gjatë natës”, pa zhvillime madhore, njoftuan autoritetet lokale të hënën.
“Shërbimet e sigurisë dhe emergjencës mbeten plotësisht të angazhuara dhe po vijojnë operacionet në terren”, thuhej në deklaratë.
Në të gjithë Francën janë evakuuar afro 260 mijë persona, përfshirë 36 mijë banorë që u urdhëruan të largohen nga një tjetër zonë e prekur nga zjarret në rajonin Landes, më në jug.
Sophie Brocas, prefektja e rajonit Nouvelle-Aquitaine, ku përfshihet edhe Gironde, tha se natyra shumë e paparashikueshme e këtij zjarri është një fenomen i paprecedentë në Francë.
“U bëj thirrje turistëve të mos vijnë në Gironde për sa kohë zjarri nuk është vënë nën kontroll. I ftoj turistët që janë tashmë këtu të mendojnë për një destinacion tjetër. Nuk e dimë se ku do të shkojë zjarri”, tha ajo.
Presidenti francez Emmanuel Macron pritej të zhvillonte të hënën në mëngjes një mbledhje të kabinetit të krizës për të diskutuar situatën.
Ministri i Brendshëm francez, Laurent Nuñez, tha të dielën se nata e kaluar kishte qenë e vështirë dhe se “situata mbetet shumë e pafavorshme”. Ai deklaroi se zjarri në Gironde ishte bërë sërish “jashtëzakonisht i fuqishëm dhe i paparashikueshëm” gjatë natës së së shtunës, duke krijuar erërat e veta dhe duke u përhapur në mënyrë të çrregullt drejt zonës metropolitane të Bordosë. Sipas tij, situata u qetësua deri në fund të natës.
Që prej së mërkurës, zjarri në Gironde ka lënduar 84 zjarrfikës, 10 prej të cilëve janë evakuuar, sipas raportit të fundit të situatës të publikuar të dielën nga prefektura.
Sebastien Bouvier, sekretar federal i sindikatës franceze CFDT, tha se zjarrfikësit nuk kanë pajisje të mjaftueshme për t’u mbrojtur nga tymrat toksikë të zjarreve.
Rreth 2 mijë e 500 zjarrfikës (përfshirë një ekip nga Zvicra), 1 mijë e 500 ushtarakë dhe rreth 1 mijë e 200 policë janë angazhuar në Gironde, tha Nuñez, duke vlerësuar edhe kontributin e 450 vullnetarëve nga organizatat e sigurisë civile.
Ai shtoi se pesë komuna të tjera në Gironde janë evakuuar gjatë natës.
Një zjarrfikës i tha agjencisë AFP se zjarri kishte krijuar një fenomen të quajtur pirokumulonimbus, një stuhi e krijuar nga zjarri, e cila “krijon erën e vet, me vorbulla, duke u bërë e paparashikueshme dhe e pakontrollueshme”.
Një zëdhënës i Federatës Kombëtare të Zjarrfikësve të Francës tha se, megjithëse ky fenomen është i njohur në vende si Australia dhe Kanadaja, një i tillë nuk ishte parë më parë në Francë. Nënkoloneli Éric Brocardi tha se nevojitet të kuptohet “një forcë natyrore përtej kontrollit tonë”.
Policia në Gironde bëri tre arrestime gjatë fundjavës, përfshirë një person që po pinte duhan në pyll dhe dy persona që po zhvillonin barbekju në një zonë pyjore.
