Inspektorati Kombëtar i Mbrojtjes së Territorit (IKMT) po vijon sot prishjen e 18 objekteve pa leje në zonën e Orikumit, një ndërhyrje që hap rrugën për vijimin e projektit strategjik “Rikualifikimi i bregdetit Vlorë-Radhimë-Orikum”, me qëllim transformimin e vijës bregdetare në një destinacion më të frekuentuar për turistët.
Objektet e prishura përfshijnë ndërtime me konstruksion beton arme me sipërfaqe totale rreth 480 m², ndërtime druri me sipërfaqe 450 m² dhe tenda me konstruksione metalike.
IKMT bën të ditur se për subjektet përgjegjëse janë marrë gjithashtu masat plotësuese sipas ligjit, duke garantuar zbatimin e rregullave të mbrojtjes së territorit.
Kjo nismë është pjesë e përpjekjeve të qeverisë për sistemimin e vijës bregdetare, krijimin e hapësirave të rregullta dhe të sigurta për investime turistike dhe shërbime publike, duke kontribuar në rritjen e cilësisë së turizmit dhe ofertës së destinacionit.
