Presidenti amerikan, Donald Trump iu bëri thirrje iranianëve të përdorin sulmet e tyre të mëdha për të rrëzuar elitën klerikale të vendit, sipas BBC.
“Kur të përfundojmë, merrni qeverinë tuaj. Do të jetë e juaja për ta marrë. Kjo ndoshta do të jetë mundësia juaj e vetme për brezat e ardhshme”, deklaroi ai.
Trump gjithashtu paralajmëroi forcat e sigurisë iraniane se do të përfitonin “imunitet” nëse hiqnin armët, përndryshe do të përballeshin me vdekje “të sigurt”.
Në fillim të janarit, Trump kërcënoi se do të bombardonte Iranin pasi forcat e sigurisë shtypën protestat antiqeveritare, duke vrarë sipas aktivistëve të të drejtave të njeriut të paktën 6 480 persona.
Trump paralajmëroi se përgjegjësit do ta paguanin shtrenjtë dhe u tha protestuesve se “ndihma ishte duke ardhur”.
Megjithatë, disa ditë më vonë presidenti ishte siguruar nga qeveria iraniane se “vrasjet kishin ndaluar” dhe fokusin e tij e zhvendosi tek programi bërthamor i vendit, i cili ka qenë qendra e një mosmarrëveshjeje të gjatë me Perëndimin.
Izraeli ka nisur një sulm “parandalues” ndaj Iranit, duke rindezur përplasjen mes dy vendeve për herë të dytë brenda më pak se një viti.
Ministri izraelit i Mbrojtjes, Israel Katz deklaroi se operacioni kishte si qëllim “eliminimin e kërcënimeve ndaj Shtetit të Izraelit”, ndërsa shpalli një “gjendje të posaçme dhe të përhershme emergjence” në të gjithë vendin, në pritje të një kundërpërgjigjeje të mundshme iraniane me raketa.
Mediat shtetërore iraniane raportuan sot shpërthime në lindje dhe veri të Teheranit, ndërsa pamje të publikuara tregojnë re tymi mbi kryeqytet.
Agjencia “Fars” dhe televizioni shtetëror IRINN konfirmuan sulmet, duke njoftuar për shpërthime të reja gjatë mëngjesit.
Sirenat e alarmit u dëgjuan në mbarë Izraelin rreth orës 08:15 me orën lokale, duke paralajmëruar për rrezikun e një sulmi me raketa.
Pas sulmit, si Izraeli ashtu edhe Irani mbyllën hapësirat ajrore për fluturimet civile.
Agjencia iraniane “Tasnim” raportoi se hapësira ajrore e Iranit është mbyllur, ndërsa mediat izraelite njoftuan për një vendim të ngjashëm nga Tel Avivi.
Tensionet mes dy vendeve mbeten të larta që nga “Lufta 12-ditore” e qershorit të kaluar, kur Izraeli goditi objektiva në Iran dhe SHBA-ja iu bashkua më pas sulmeve ndaj impianteve bërthamore iraniane.
