Kryetari i grupit parlamentar të Partisë Socialiste, Taulant Balla kërkoi sot përfaqësimin e të gjitha partive parlamentare në komisionin e posaçëm të Reformës Zgjedhore.
Në një prononcim për mediet nga selia e Kuvendit, Balla shprehu angazhimin për përmbylljen me konsensus të reformës zgjedhore.
“Është e domosdoshme që edhe partitë parlamentare që nuk kanë grup parlamentar të jenë të përfaqësuara në komisionin e posaçëm të reformës zgjedhore. Propozimi ynë është që të jemi të barabartë në numër dhe në të drejtën e vetos, që është garancia më e madhe që dy partitë e mëdha kanë”, u shpreh Balla.
Balla theksoi se PS dëshiron dhe vazhdon të këmbëngulë për pjesëmarrjen e të gjtiha partive parlamentare, ndaj dhe e kemi lënë pezull vetëm këtë pikë të vendimit që ta miratojmë të gjithë së bashku dhe partitë e tjera parlamentare të jenë aty.
“Vazhdojmë të jemi të angazhuar për të dhënë një zgjidhje për këtë çështje. Nuk ka asnjë vendim substancial në këtë komision nëse përfaqësuesi i PD-së apo i PS-së ushtron veton”, shtoi ai.
