Në një deklaratë për mediat, i mandatuari i Partisë Demokratike për të zhvilluar negociatat me aleatët, Ilir Alimehmeti, tha se takimet që ka zhvilluar me kreun e Nismës Thurje Endri Shabanin dhe atë të Shqipëria Bëhet, Adriatik Lapajn kanë qenë miqësore.
“Ne kemi bisedime, patjetër. Ju kujtoj se Shabani është këshilltar në Bashkinë e Tiranës, kështu që nuk diskutohet që bashkia, patjetër, diskutohet nga këshilltarët. Një pjesë janë shoqërore, një pjesë janë formale. Ne flasim në mënyrë të vazhdueshme për Bashkinë e Tiranës,” tha ai i pyetur nga gazetarët për takimin me Shabanin.
Alimehmeti u pyet nga gazetarët pas takimit të zhvilluar sot në një hotel në Tiranë me përfaqësuesit e partive aleate, në kuadër të negociatave për zgjedhjen e një kandidati të përbashkët në zgjedhjet për Bashkinë e Tiranës.
Javën e kaluar, PD pati disa takime me aleatët, ku tre të mandatuarit, Belind Këlliçi, Ilir Alimehmeti dhe Flamur Noka, nisën bisedimet me Fatmir Mediun nga PR dhe Agron Dukën nga PAA.
