Policia Kufitare ka finalizuar operacionin e koduar “Smartphone”, duke goditur një rast kontrabande në Portin e Durrësit.
Gjatë kontrolleve të intensifikuara në hyrje/dalje të territorit, u arrestua në flagrancë një 53-vjeçar nga Kosova, i identifikuar me inicialet S. I.
Ky shtetas tentoi të fuste kontrabandë 49 celularë të markës iPhone, të cilët i kishte fshehur në kabinën e kamionit që drejtonte. Pajisjet celulare nuk ishin të shoqëruara me fatura blerjeje.
Policia sekuestroi celularët, kamionin dhe dy telefonat që përdorte vetë i arrestuari, ndërsa materialet procedurale i kaluan Prokurorisë së Durrësit për veprime të mëtejshme.
