Kolegji Zgjedhor rrëzon Adriatik Lapajn, mandati i takon Ana Dajkos
Mandati i vetëm që fitoi Nisma Shqipëria Bëhet në zgjedhjet e 11 majit i takon Ana Dajkos. Vendimin përfundimtar e dha Kolegji Zgjedhor që zgjidhi në këtë mënyrë përplasjen mes Adriatik Lapajt të Shqipëria Bëhet dhe Endrit Shabani nga Nisma Thurje.
Të dy u futën në koalicion në zgjedhje, por rezultati me vetëm një mandat solli mosmarrëveshje mes palëve. Zeqir Kordhoni, i afërmi i Endrit Shabanit, i kërkoi Komisionit Qendror të Zgjedhjeve që të mos merrte parasysh një firmë që ai kishte dërguar para zgjedhjeve që hiqte dorë nga mandati i listës së mbyllur.
Por kjo krijoi konflikt pasi plani i dakordësuar mes palëve ishte që emrat në listat e mbyllura që janë familjarë të përfaqësuesve të partisë të jepnin dorëheqjen dhe gara të zhvillohej vetëm mes emrave në listat e hapura.
Ky vendim i Kolegjit i hap rrugë certifikimit përfundimtar të zgjedhjeve.
Politika shqiptare pritet të rikthehet në skenë në Shtator. Mandati i Kuvendit aktual mbyllet më 9 shtator, ndërsa parlamenti i ri pritet të nisë jo më shumë se 10 ditë më vonë.
Seanca hapëse do të jetë vetëm konstituive, pa axhendë dhe pa debate. Rregullorja e Kuvendit përcakton që drejtimin e seancës së parë e merr deputeti më i vjetër në moshë. Edhe në këtë legjislaturë, radha i takon Sali Berishës, i cili është 81 vjeç.
Në rast refuzimi, stafetën e marrin Tritan Shehu ose Vasil Llajo, deputeti socialist i listës së Vlorës. Menjëherë pas hapjes, Kuvendi nis verifikimin e mandateve dhe më pas 140 deputetët e rinj do të bëjnë betimin.
