Partitë më të mëdha shqiptare janë bërë bashkë në një listë për të garuar në zgjedhjet komunale në Graçanicë.
Lëvizja Vetëvendosje, Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës do të garojnë me iniciativën Aleanca Shqiptare, ka bërë të ditur nënkryetari i Komunës së Graçanicës, Leutrim Ajeti.
Ajeti, i cili është edhe kandidat për kryetar të kësaj komune, ka njoftuar se në ditët në vijim do të bëhet i ditur edhe programi qeverisës për katër vitet e ardhshme.
“Ditëve në vijim do të dalim edhe me programin tonë qeverisës për katër vitet e ardhshme, program që do të përfshij investim në çdo pjesë të Graçanicës, pa dallim etnie e feje, sepse ALEANCA SHQIPTARE do t’ju shërbej të gjithëve. Po ashtu, këto ditë do të njoftoheni me listën e kandidatëve për Asamblenë Komunale, e cila do t’jetë listë fituese e këtyre zgjedhjeve”, ka shkruar në rrjetet sociale.
