Lista e re e tarifave e shpallur nga presidenti Donald Trump ka shkaktuar një valë paniku në tregjet globale, me bursat që regjistruan humbje të mëdha. Zyrtarisht u tha se shtyrja deri më 7 gusht u bë për t’u dhënë kohë doganave që të përshtaten me rregullat e reja, por sipas analizave, arsyeja e vërtetë mund të jetë për të fituar kohë për marrëveshje të reja tregtare.
Vetëm gjatë ditës së djeshme, bursat europiane humbën rreth 269 miliardë euro. Indeksi CAC 40 në Paris ra me 2.91%, ndërsa Milano humbi 2.55%, që përkthehet në rreth 22 miliardë euro. Rënie të ndjeshme u shënuan gjithashtu në Wall Street dhe në tregjet aziatike si Tokio, Hong Kong dhe Seul.
Edhe pse nuk jemi në nivelet dramatike të prillit, kur paniku në tregje ishte më i madh, situata aktuale shihet si një përshkallëzim i një lufte të re tregtare të iniciuar nga Trump, i cili kërkon të rishkruajë rregullat e sistemit global në emër të politikës “Amerika e Para”.
Trump përdor shpesh strategjinë e “negociatave agresive”, duke propozuar masa ekstreme për të biseduar më pas marrëveshje më të favorshme për SHBA-të. Megjithatë, ende mbetet për t’u parë nëse ky bast do të rezultojë i suksesshëm.
Ndërkohë, Wall Street reagoi negativisht edhe për shkak të një raporti zhgënjyes mbi punësimin. Dow Jones ra me 1.23%, Nasdaq me 2.24%, dhe S&P 500 me 1.60%. Raporti i fundit tregon një ngadalësim të ndjeshëm të punësimeve në korrik, me vetëm 73 mijë vende të reja pune, shumë më pak se pritshmëritë prej 100 mijë.
Këto shifra shkaktuan zemërimin e Trump, i cili vendosi të shkarkojë drejtoreshën e statistikave të Departamentit të Punës, Erika McEntarfer, e emëruar nga Joe Biden. Ai e akuzoi atë se kishte manipuluar të dhënat për të ndihmuar Kamala Harris përpara zgjedhjeve. Ndërkohë, norma e papunësisë u rrit nga 4.1% në 4.2%, me një humbje prej 84 mijë vendesh pune që nga kulmi i këtij viti.
Situata pritet të ndikojë edhe në vendimet e ardhshme të Rezervës Federale, e cila mund të detyrohet të rrisë normat e interesit, ndryshe nga dëshirat e Trump për uljen e tyre. Presidenti kërkoi hapur në rrjete sociale që kreu i saj, Jerome Powell, të zëvendësohet, duke deklaruar se nëse ai nuk merr masa, “bordi duhet të marrë kontrollin”.
Në të njëjtën kohë, një zhvillim tjetër i rëndësishëm erdhi nga Adriana Kugler, anëtare e bordit të Rezervës Federale, e cila dha dorëheqjen disa muaj para përfundimit të mandatit. Kjo i jep Trump-it mundësinë të emërojë një tjetër figurë besnike në një nga institucionet më të rëndësishme financiare të vendit.
