Ushtria ruse gjuajti 36 raketa, përfshirë raketa kruiz, në Ukrainë gjatë natës, kundër infrastrukturës së rëndësishme në ish-republikën sovjetike.
”Fatkeqësisht, ka goditje në veri, perëndim dhe në rajonet Dnipropetrovsk dhe Kirovohrad”, tha kreu i zyrës presidenciale, Andriy Yermak, në kanalin e lajmeve në Telegram.
Ai tha se ushtria ruse kishte filluar të përdorte edhe raketa të rreme për të mashtruar mbrojtjen ajrore gjithnjë e më të sofistikuar të Ukrainës.
Komanda e ushtrisë ukrainase tha se rreth 16 nga raketat ishin interceptuar dhe goditur.
Sipas autoriteteve, një grua 79-vjeçare u vra në Pavlohrad në rajonin e Dnipropetrovsk si rezultat i një sulmi me raketa.
Tetë persona u plagosën.
Dëme u raportuan në 50 banesa dhe në një impiant industrial.
Në rajonin perëndimor të Ukrainës, Lviv, tre raketa goditën atë që përshkruhej si një strukturë infrastrukturore e rëndësishme.
Goditje të tjera u raportuan pranë Kremenchuk dhe Kropyvnytsky në rajonet qendrore të Ukrainës, Poltava dhe Kirovohrad.
Sekretari i Këshillit të Sigurimit të Ukrainës, Olexiy Danilov, shprehu shqetësime për një rritje të sulmeve javën e ardhshme.
Të enjten, Rusia feston të ashtuquajturën “Dita e Mbrojtësit të Atdheut”, ndërsa e premtja shënon përvjetorin e parë të pushtimit të Ukrainës.
Që nga tetori, ushtria ruse ka përdorur sulme masive me raketa kundër infrastrukturës ukrainase, veçanërisht asaj të furnizimit me energji elektrike.
